Darf i mi churz vorsteue
Mi Name isch Barbara.
D Fröid ar Kreativität isch üs ir Familie vorgläbt worde. Ob mit Textilie, Läder, Houz oder ir Chuchi, mir chunnt immer wieder öbbis Nöis i Sinn.
Z Usprobiere, Nöis us Autem erschaffe und z Beschtmögleche us däm wo-ni ha lah z entstah, das bericheret mis Läbe. Mängisch gang i mit ere Idee chli „schwanger“, bevor i se cha umsetze. Doch dä Prozäss isch genauso erfüllend wie eifach loszlegge.
Zum Glück ha-ni e grosse Eschtrich – Material-Depot – so chan-i us em Voue schöpfe und mine Idee freie Louf lah.
Über mi
01
Dr Aafang
Afa näje ha-ni mit Blache-Täsche. De si Chinder-Chleider, Speziauhose für mis Gotte-Meitschi, Lagerigs-Chüssi für ne Fründin und Klamotte für mi Sohn u mi derzue cho. Zum Teil ha-n i Schnittmuschter gha oder i ha säuber gmacht. Es isch nid immer aues guet usecho, doch mit mim „beschte Fründ“ – em Fädlitrenner – ha-ni de haut die Naht wieder uftah oder nomau ganz vo vore agfange…
02
Di nöii Näjmaschine
Mit vierzgi ha-ni mir e besseri Näjmaschine gchouft. Mittlerwyle ha-ni ou e Overlock und e Maschine, wo-ni cha Läder näje (Merci Ueli!!!) So cha-ni die verschiedenste Materialie be- und verarbeite. U syt vier Jahr ha-ni sogar es richtigs Atelier bi mir dehei wo-ni eifach cha derhinger gah, wes mir passt. Geniau!
03
D Näjwärchstatt
Sit 2018 leite-ni – ehreamtlech – e offeni Näjwärchstatt, wo-ni mini Begeisterig fürs Näje wytergibe.
I ha immer wieder sehr positivi Rückmäudige uf mini Kreatione übercho, drumm wett i die am ne wytere Publikum zeige.
U so isch dr hose-sack entstange
Dr Marco (mi Sohn) isch mau hei cho u het gfragt: „Mam, chasch du die no bruche?“u häbt mir es paar verschnitteni Schnittschutz-Hose häre (us Sicherheitsgründ dörfe die nümme brucht wärde).
I ha gseit: „Ja klar, da hets ja no gnue ganze Stoff drann.“
